கம்பன் உறவுகளின் கனிந்த வாழ்த்துகள்

கடந்த 19/10/2014 அன்று பிரான்சு கம்பன் கழகத் தலைவரின் மகளது மஞ்சள் நீராட்டு விழாவின் போது கம்பன் உறவுகளால் எழுதப்பட்டு மூன்று தலை முறைகளையும் வாழ்த்தியக் கவிதை: 

பாவரசி வாழ்த்துக் கவிதை

இறைவன் என்னும் படைப்பாளன்

இன்பத் தமிழின் ஈர்ப்பாளன்

குறையாக் கவிதைக் காப்பாளன்

குன்றில் நிற்கும் குமரனவன் !

மறையா நிலவாய்ப் படைத்திட்டான்

முனைந்தே கவிஞன் சனார்த்தனனும்

நிறையும் நெஞ்சில் வடித்திட்டான்

நீண்டு வாழ்க வாழியவே !

வாழை போலும் தொடர்ந்திடவே

வள்ளல் வழியில் பாரதிபோல்

தாழை மணமாய்க் கவிதைதனைத்

தானும் தருவான் செல்வனவன் !

மாழை மணியாய் அவன்புகழும்

மலர்ந்து எங்கும் வீசுகவே !

மோழை அகற்றும் வாழ்வதனில்

மேலும் மேலும் வளர்ந்திடவே !

பெயர்த்தி வந்தாள் பாவரசி

பெயரை மீண்டும் நாட்டிடவே

செயலும் சொல்லும் வளம்பெறவே

சிற்ப அழகின் சாயலிலே !

தயவாய் அருளைப் பொழிந்திடவே

தாழ்ந்து தாளைப் பணிகின்றோம் 

சயனம் கொண்டே அவள்நாவில்

சத்தியம் என்றும் தழைத்திடவே !

கம்பன் உறவுகள்

பொன்விழாக் காணும் பாவலர் கி. பாரதிதாசனை வாழ்த்தி கழகக் கவிஞர்கள் படைத்தவை:

செந்தமிழ் அன்னையின் சீர்வளர் பெற்றியர்!

அந்தமிழ்க் கம்பன் அருட்செல்வர்! - சிந்தைமகிழ் 

பொன்விழா போற்றுகின்ற பாரதி தாசனார் 

பண்ணலாம் காண்க படர்ந்து!

                                             

- கவிஞர் வே. தேவராசு

நாமகள் பாராட்ட நற்றமிழ் தேனூட்ட 

பூமகள் சீராட்டும் பொன்விழா! - பாமகனாம் 

பாரதி தாசனார் பல்லான் டிசைபெறவே 

பேரருள் கூட்டும்நற் பேறு!

                                              

-கவிஞர் சரோசா தேவராசு 

பார்புகழ்க் கம்பன் படைப்பைப் பறைசாற்றும் 

தார்புகழ்ப் பாரதி தாசனே! - பேரன்பால் 

ஊர்புகழ் நீபெற்றும் ஓங்கு தமிழ்காத்தும் 

சீர்புகழ் காண்க சிறந்து!

                                           

- கவிஞர் தணிகா சமரசம் 

பொன்விழாக் கோலமுறும் பாரதி தாசன்..பாத் 

தன்னிலே தான்மயங்கித் தள்ளாடும் - தென்றலே!

காதலிலே ஆயிரந்தான் கண்ணுற்ற வல்லுனனும் 

வாதமிட உண்டோ வழி?

                                 

-கவிஞர் இராசேசுவரி சிமோன் 

வானின் நிறைமதியோ? வீசும் வளியோ?செந் 

தேனின் நறுஞ்சுவையோ? தென்றலோ? - காநேழிலோ?

மானின் தனிநடையோ? மாண்பார் கவிமணி கி.

பா.வின் தெளிதமிழ்ப் பா!

                                 

-பேராசிரியர் பெஞ்சமின் லெபோ 

வந்தவரை வாயார வாழ்த்தி வரவேற்றுத் 

தந்தநலங் கூறுந் தமிழழகை! - சொந்தமென 

எம்மை அரவணைக்கும் இங்கவியே! பாரதியே!

உம்மை அடையும் உயர்வு! 

                                 

- மருத்துவர் த. சிவப்பிரகாசம் 

கம்பன் கவிதைக் கடலில் குளித்தாடி 

இம்மண் செழிக்க எழுதுபவர்! - செம்மலாம் 

பாரதி தாசரைப் பாரே புகழ்ந்தேத்தும்!

பேரருள் காக்கும் பெரிது!

                                   

- திருமிகு சிவஅரி